لوازم مركز التدريب شنطة الميري شنطة الجيش اخد ايه معايا وانا رايح الجيش حاجات مهمة للجيش
في المقالة هتعرف معايا اهم الحاجات والأشياء اللي لازم حتماً ولابد تاخدها معاك وانت رايح مركز التدريب أو الجيش عموماً سواء داخلية أو حربية مش هتفرق كتير.
الحاجات اللي هقولك عليها دي ضرورية ومهم اوي تاخدها معاك وانت رايح مركز التدريب عشان متحتاجش لحد وكمان تكون ظابط امورك كلها وميكونش ناقصك حاجة عشان تبقى مرتاح.
هنتكلم عن موضوعين... حاجات ولوازم أساسية لازم تاخدها معاك وحاجات مش شرط تاخدها
أولاً حاجات أساسية لازم تاخدها وانت رايح مركز التدريب
1. الملابس
- 4 اطقم داخلية
- 2 شروال و 2 كلسون عليهم لو في الشتا
- 3 تي شيرت صيفي او ترنجين شتوي لو مركز ندريبك في الشتا
- ملاية للسرير اللي هتنام عليه
- دفاية تتغطى بيها من الناموس او تحطها تحت البطانية الخشنة بتاعة الجيش في الشتا
- كيس مخدة او حط المخدة تحت الملاية عادي وكلنا عملناها
- فوطة
- شبشب
- كوتشي باتا ابيض
- شرابات تقيلة للبيادة أو خفيفة للباتا
2. أدوات شخصية مهمة جدا
- فرشة سنان ومعجون
- مكن حلاقة بعدد ما تحتاج في شهر او حسب المدة
- هات فووم لحلاقة الدقن عشان يريح دقنك
- هات أفتر شيف ما بعد حلاقة الدقن عشان الالتهابات وده مهم جدا
- صابونة بريحة
3. أدوية
- شريط "كونجستال" للبرد
- "مرهم فيوسيدرم" عشان لو اتقرصت من حشرة البق وهي أرخم وأزبل حشرة ممكن تلاقيها في حياتك
- بودرة قدم و دي بتيجي من عند بتاع المنظفات عشان رائحة الرجل
- شريط" بارسيتامول " عشان لو حسيت بصداع
4. لوازم أساسية أخرى
- قفل كمبيوتر للدرفة اللي هتستلمها
- هاندفري عشان تسمع قرآن ربنا وخطب دينية وحاجات جميلة و هتعدي يومك بسلام
- معلقة للأكل أو اتنين تلاتة من باب الاحتياط
- ورنيش للبيادة
- فرشة خشنة تنضف بيها البيادة والباتا والشبشب
ثانياً حاجات تاخدها معاك، ولو ما أخدتهاش هتلاقيها متوفرة هناك
- ابرة وخيط ....... وغالباً فيه ترزي في كل مركز تدريب في مصر
- سجادة صلاة .... مش ضروري لأن كل منطقة في الجيش هتلاقي مسجد أو مصلى
- مسحوق غسيل .. و ده موجود في أي كانتين في الجيش
- مناديل ... موجودة في اي كانتين
- مج للشاي .. موجود كبايات ورقية في كل كانتين بردو
تعالى أقولك شوية حاجات اهم من اللي فات
بص يا سيدي، فترة الجيش فترة صعبة نوعاً ما، وهتصادف اشكال وألوان من كل حتة في مصر، وده هيعلمك كتير، وهيغير فيك حاجات كتير.
الجيش بيعمل رجالة، لأنك هتشوف شدة وحزم هيفرقوا معاك في حياتك بعد كده، وهتشوف مواقف تعلمك قيمة الصبر.
حاجات كتير كنت بتعملها قبل الجيش مش هتعملها بعد الجيش، وحاجات عمرك ما عملتها، هتعملها بعد الجيش
متشربش سجاير في الجيش ومتتعلمش شرب السجاير لأن دي أوسخ حاجة الشباب بيلقطوها من بعض، وملهاش اي تلاتين لزمة وملهاش علاقة بالمرجلة ولا الشخصية.
السجاير حرام وهدر صحة وهدر مال وصورة اجتماعية سيئة ويكرهها الله ورسوله.
متاخدش كل حاجة في الجيش على اعصابك عشان متتعبش، وهي فترة بيحبها ناس كتير وبيكرهها ناس كتير بردو.
وحط في بالك انهاا هتعدي زي اي حاجة ما بتعدي، بس حاول تستعين بالله في كل امورك عشان ربنا يعديهالك على خير.
الصلاة طبعا طول عمرك، لكن في الجيش الصلاة عبادة وسكينة وخير صاحب ورفيق وهتحقق لك الهدوء اللي انت محتاجه ف الجيش.
الظابط والصف ظابط والعسكري الأقدم منك، دول اخواتك، هما بيأدوا مهام شغلهم، وانت ليك فترة عندهم، ومش هتقعد معاهم طول العمر، فمترخمش على حد ولا تتعب حد من زمايلك أو من الأعلى منك رتبة.
ومتنساش الشعار اللي هتسمعه هناك أكتر ما بتسمع اسمك " حب الجيش... الجيش يكرهك.... اكره الجيش.... الجيش يحبك".
بمعنى اصح، متعدش ايام الجيش ولا تفكر وتحسب كتير وحاول تقضي فترة جيشك بروقان هتلاقيها بتجري هوا
ربنا يعديها للجميع على خير
لا تنسى أنك قرأت هذا الموضوع
★♥☆ آخد ايه معايا وأنا رايح مركز التدريب في الجيش ☆♥★
فقط في موقع المحترف الثقافي
تعليقات
إرسال تعليق